بهجت آباد خاطره سی
اولدوز سایاراق گوزله‌میشم هر گئجه یاری
گئژ گلمه‌ده دیر یار ، گئنه اولموش گئجه یاری
گوزلر آسیلی یوخ نه قارالتی نه ده بیر سس
باتمیش قولاغیم گور نه دوشورمکده‌دی داری
بیر قوش آییغام سویله‌یه‌رک گاهدان اییلده‌ر
گاهدان اونودا یئل دئیه لای لای هوش آپاری
یاتمیش هامی بیر آللاه اویاخدیر داها بیر من
مندن آشاغی کیمسه یوخ اوندان دا یوخاری
قورخوم بودو یار گلمه‌یه بیردن یاریلا صوبح
باغریم یاریلار صوبحوم آچیلما سنی تاری
دان اولدوزو ایستر چیخا گوز یالواری چیخما
او چیخماسادا اولدوزمون یوخدی چیخاری
گلمز تانیرام بختیمی، ایندی آغارار صوبح
قاش بیله آغاردیخچا داها باشدا آغاری
عشقین کی فرارینده وفا اولمیاجاقمیش
بیلمم کی طبیعت نیه قویموش بو قراری
سانکی خوروزون سون بانی خنجردی سوخولدو
سینمده اورک وارسا کسیب قیردی داماری
ریشخندیله قیرجاندی سحر سویلدی: دورما
جان قورخوسو وار عشقین، اوتوزدون بو قوماری
اولدوم قارا گون، آیریلالی او ساری تلدن
بیله قارا گونلردی ائده دن رنگیمی ساری
گوز یاشلاری هر یئردن آخارسا منی توشلار
دریایه باخار بللی‌دی چایلارین آخاری
از بس منی یاپراق کیمی هیجرانلا سارالدیب
باخسان اوزونه سانکی قیزیل گولدو قیزاری
محراب شفقده اوزومو سجده ده گوردوم
قان ایچره غمیم یوخ، اوزوم اولسون سنه ساری
عشقی واریدی شهریارین گوللو، چیچکلی
افسوس قارا یئل اسدی، خزان اولدو باهاری
عضو شوید
عضویت سریع
آمار
وب سایت:
آمار مطالب
آمار بازدید